აკაკი კურტანიძე – აფხაზეთის გმირი

გამორჩეული ქართველი ვაჟკაცი, თავისუფლების რაინდი, დაიბადა 1934 წელს ბორჯომის რაიონის სოფელ საკირეში. 1958 წლიდან – ოჯახის შექმნის შემდეგ, ცხოვრობდა სოხუმის რაიონის სოფელ თავისუფლებაში, ჰყავდა 4 შვილი და 4 შვილიშვილი. 1992 წელს აფხაზეთში ომის დაწყების პირველი დღიდან მსახურობდა 23-ე ბრიგადის მე-8 ბატალიონის I ასეულში, იყო მისი შემქმნელი და პირველი მეთაური, შემდეგ ბატალიონის მეთაურის მოადგილე. კაკო კურტანიძემ თავი გამოიჩინა, როგორც სამშობლოს ერთგულმა,თავდადებულმა პატრიოტმა. 60 წლის ვაჟკაცს, მებრძოლები ,,მთის ვეფხვს“ ეძახდნენ. კაკო კურტანიძის უნარიანი ხელმძღვანელობით ბატალიონმა მტრის არაერთი შემოტევა მოიგერია. მან განსაკუთრებით თავი გამოიჩინა 1993 წელს ივლისის შემოტევების დროს, როდესაც რუსეთის გენ-შტაბში დაიგეგმა სოხუმის აღების ოპერაცია შრომა-ცუგურუვკის სიმაღლეების მიმართულებით. ამ სისხლისმღვრელ ბრძოლებში კაკო კურტანიძის მეთაურობით მოგერიებულ იქნა სომხების ,,ბაგრამიანის’’ ,ჩეჩნების ,,შამილ ბასაევის’’, რუსეთის ,,ფსკოვის დივიზიის“ ბატალიონების შემოტევები. იმ ბრძოლებში მტერმა დიდი დანაკლისი განიცადა და უკან დაიხია, თუმცა 9 ივლისს კაკო კურტანიძე გმირულად დაეცა ბრძოლის ველზე. აკაკი კურტანიძე სიცოცხლეში დაჯილდოვებული იყო ვახტანგ გორგასლის III ხარისხის ორდენით,ხოლო სიკვდილის შემდეგ, საქართველოს პრეზიდენტის განკარგულებით სამშობლოს მთლიანობისთვის ბრძოლაში გამოჩენილი გმირობის , ვაჟკაცობისა და თავგანწირვისათვის აკაკი კურტანიძე დაჯილდოვდა ვახტანგ გორგასლის I ხარისხის ორდენით.  გმირების მარადისობა ქვეყნის წარსულში, აწმყოსა და მომავალშია.