კახა იპოლიტეს ძე ტაბაღუა  დაიბადა 1967 წლის 16 მარტს გალის რაიონის  სოფელ კოხორაში.   კოხორის საშუალო სკოლის რვა კლასის დაამთავრების შემდეგ სწავლა გააგრძელა აჩიგვარის ტექნიკუმში, მექანიზაციის ფაკულტეტზე. ტექნიკუმის დამთავრების შემდეგ გაწვეულ იქნა საბჭოთა არმიის რიგებში, მსახურობდა წყნარი ოკეანის საზღვაო ფლოტში.           კახა ტაბაღუა აფხაზეთში ომის დაწყების პირველივე დღიდან ჩადგა მამულის დამცველთა რიგებში.  ირიცხებოდა საქართველოს რესპუბლიკის თავდაცვის სამინისტროს

23-ე მექანიზირებული ბრიგადის  მე-6 სატანკო ბატალიონის ზურგის სამსახურში, სამეურნეო ოცეულის საწვავ-საპოხი მასალების საწყობის უფროსის თანამდებობაზე. აქტიურად მონაწილეობდა ბატალიონის საბრძოლო ოპერაციებში   მდინარე გუმისთის პირას.

1993 წლის 4 ივლისს სოხუმზე შეტევის მოგერიებისას კახა ტაბაღუა მე-6 ბატალიონის ქიმიური ოცეულის საბრძოლო პოზიციაზე,  მდინარე გუმისთის პირას, სოფელ ქვემო ეშერასთან, მძიმედ დაიჭრა და ჭრილობების შედეგად საავადმყოფოში გარდაიცვალა.

საქართველოს პრეზიდენტის განკარგულებით სამშობლოს ტერიტორიული მთლიანობისათვის ბრძოლაში გამოჩენილი გმირობის, ვაჟკაცობისა და თავგანწირვისათვის კახა ტაბაღუა, სიკვდილის შემდეგ, დაჯილდოებულია ვახტანგ გორგასლის  II ხარისხის ორდენით.